Вторник, 09.03.2021

                                             E-mail: Cherkscool_ytyk@mail.ru     Тел: 8-411-52-25-515  Адрес: 678661, Таттинский улус, с. Черкех ул. Ойунского, 92/3
ГЛАВНАЯ РегистрацияВход
Приветствую Вас, Гость
СВЕДЕНИЯ об ОО
СВЕДЕНИЯ об ОО
СВЕДЕНИЯ об ОО
СВЕДЕНИЯ об ОО
9
 
Главная » 2021 » Февраль » 20 » Оскуолабыт 115 юбилейдаах сылын арыйар тэрээһин буолла
11:08
Оскуолабыт 115 юбилейдаах сылын арыйар тэрээһин буолла

«Учуутал» диэн ааттан хараҥа кыйданар,

«Оскуола» диэн тылтан дьылҕабыт таҥыллар.

Үөрэхтэн-билииттэн сайдыыбыт салҕанар, 

Дьоһуннаах иитииттэн түөрэхпит түстэнэр.

 

Бүгүн, олунньу 19 күнүгэр, Чөркөөх орто оскуолата, 115 юбилейдаах сылын арыйар тэрээһин буолан ааста. 

 Бу тэрээһиҥҥэ оскуолабыт үбүлүөйдээх күнүгэр Октябрьскай нэһилиэк баһылыга, Семенов Андрей Петрович, уонна оскуолабыт үтүөлээх ветераннара, Кычкина Полина Федоровна, Аржакова Зоя Афанасьевна, Филатова Розалия Николаевна, Мурунова Варвара Дмитриевна, Федосеева Клара Петровна, Богатырева Лидия Егоровна, Жегусов Иннокентий Степанович, ону тэҥэ оскуола 50 сыллаах выпускниктара - Филатова Светлана Николаевна, Жегусова Мария Михайловна кэлэн ыалдьыттаан, баҕа санааларын этэн, уруккуну санаһан, ахтыһан аастылар. 

Тэрээһин саха үгэһинэн "Алгыһынан" арылынна, Алгыһы иилээн - саҕалаан ыытта, уһун сылларга нэһилиэги салайсыбыт ытыктабыллаах үлэ ветерана, Чөркөөхтөөҕү норуодунай театр артыыһа Октябрьскай нэһилиэк олохтооҕо Василий Федосеевич Ефремов. Улуустааҕы үөрэх управлениятын аатыттан - Осипова Наталья Дмитриевна, оскуолабыт дириэктэрэ - Сунхалыров Святослав Васильевич уонна дириэктэри үөрэх өттүнэн солбуйааччыта - Оконешникова Мария Дмитриевна үөрэх, үлэ уонна оҕолор сиьиһиилэрин сырдатан оскуола түбүгүн билиһиннэрдилэр. 

Оскуола 115 сыллаах юбилейыгар билиигэ-көрүүгэ, чинчийэр үлэҕэ хас биирдии кылааска сорудах бэриллиннэ. Сорудаҕы туттарда Саха Республикатын үөрэҕириитин туйгуна, Россия уопсай үөрэхтээһинин бочуоттаах үлэһитэ, оскуола түмэлин салайааччыта - Сокольникова Марианна Семеновна.

Былыр-былыргыттан Таатта улууһун Чөркөөҕө киэҥ историялаах, дириҥ силистээх-мутуктаах. Кыракый Чөкөөх эмээхсинтэн төрүттэнэн Чөркөөх диэн ааттанан улууһу, бүтүн республиканы ааттатар чулуу дьону, саха саргытын салайсар саха саарыннарын үүннэрбит ытык сиринэн биллэр. Манна төрөөн-үөскээн, үүнэн-сайдан тахсыбыттара саха бастыкы үөрэхтээхтэрэ: идэтийбит быраас Сокольников Прокопий Нестерович, художник Попов Иван Васильевич, айар тыл аҕата Кулаковскай-Өксөкүлээх Өлөксөй, капитан Богатырев Афанасий Данилович, Чөркөөххө маҥнайгынан оскуоланы астарбыт, Сивцев Матвей Матвеевич-Маппыайабыс учуутал о.д.а.

Бүгүҥҥү тэрээһиҥҥэ, Былатыан Ойуунускай хоһоонунан «Көҥүл ырыатын» толордулар 7 кылаас үөрэнээччилэрэ, ыалдьыттарга анаан эҕэрдэтин тиэртэ 4 кылаас үөрэнээччитэ Чемпосова Анжела «Сахсырҕалаах таракаан» үгэ монологунан, салайааччы Саха Республикатын культууратын туйгуна Филатова Розалия Николаевна, Решетникова Анна Филипповна салайыытынан «Оскуола биһигэ» ырыанан эҕэрдэлэрин тиэртилэр 5 кылаас үөрэнээчиилэрэ. 

Оскуолабыт үбүлүөйдээх сылын арыйар тэрээһиммит Лукачевскай Иннокентий тылларыгар, Охотина Лидия мелодиятыгар «Чөркөөхпөр» диэн ырыанан түмүктэннэ.

 

Иһитиннэрэр медиа: Былатыан Ойуунускай аатынан Чөркөөх орто оскуолатын 9 кылааһын үөрэнээччилэрэ Кириллина Аделина, Массаева Эльза. 

Хаартыскалар: Варламова Лида, 10 кылаас.

 

Просмотров: 37 | Добавил: GM | Рейтинг: 0.0/0
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]
Copyright GM © 2021